《信報》曹仁超 – 投資者日記

大學畢業不等於事業無憂

  今春巴黎唔再浪漫,法國年輕人唔再上大學,而係喺大學內示威,理由係政府通過法例,二十六歲以下年輕人在首兩年內隨時可以被炒,目的係協助年輕人就業(二十六歲以下失業率超過20%),但年輕人唔領情,加上工會支持,因此到處都係示威,就嚟拍得住香港呢個示威之都矣!今天年輕人就業問題已全球化,教育愈普及,國家問題愈多,因為年輕人喺大學內以「反叛」去突出自己嘅獨特性格,返工令人感覺老套,示威才令人感覺年輕;工作係為興趣,因此不能沉悶、不能奴役、不能垃圾「garbage job」,每份工作都必須有挑戰性、有前途、有嘢學。

  過去年輕人嚟《信報》見工之時,佢地通常問加入《信報》有冇嘢學?我老曹十分奇怪,公司點解畀你萬幾元一個月去教你嘢?當然你曉偷師係你好嘢。年輕人必須知道,今天大學生已唔代表乜嘢,再冇高薪厚職等住你去做,公司請你,通常係畀三個月試用期你去證明你對公司有用,唔係每個月畀你萬多元去教你嘢!我地唔係大學,只係商業機構!如你無法達到公司要求就係咁先大拜拜,毋須政府立法。所以話,福利制度害人,法國又係另一例子。

  大部分中產家庭都希望送自己子女上大學。今天如果你希望子女有份似樣D嘅白領工作,大學畢業係必要條件。但事業成功與否,又同係咪上大學無關,而係你子女嘅IQ、家庭背景、野心等決定。子曰:「一命、二運、三風水、四積陰德、五讀書,讀書排到第五(當然如你要成為建築師必須上大學,你要做醫生亦必須上大學)。我老曹嘅朋友之中,未讀過大學而事業成功者唔少,亦有唔少朋友大學畢業卻一世打工,唔見得特別出色。

  上大學可以建立人際關係(同學間日後可互相幫助),大學亦為你提供校園關係,例如成為某某大學同學會嘅會員。如果只為求知識,去圖書館或上網搵可能更快更多。讀大學時,講師會話你知幾時考試,你可事前準備,但現實社會卻唔會;例如亞洲金融風暴話嚟就嚟,唔會事先告訴你。大學有講師、教授等指導你,現實社會不但冇人幫你,反而有人想害你。考入大學困難,但畢業容易;現實社會卻係入行容易,要做得出色卻困難。

  如果你嘅子女已考入大學,恭喜你,叫你嘅子女好好享受大學生活,但以為從此事業方面無憂便錯晒,因為現實社會同大學生活完全係兩回事。如果你嘅子女入不了大學,亦恭喜你,早點讓你嘅子女體驗真實社會,講唔埋佢因為IQ高、野心大,成為另一個李超人!

[信報 2006.03.27]

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s